Putin-Erdogan, akord për Sirinë dhe heqjen e kufizimeve

Moska ka ndërmarrë masa shtrënguese në disa fusha, pas përshkallëzimit të tensioneve mes dy vendeve, kur Turqia rrëzoi një avion rus në afërsi të kufirit sirian nëntorin e vitit 2015.

Si kundërpërgjigje, Turqia vendosi një tarifë importi për disa mallra ruse. Në një konferencë të përbashkët për shtyp, pas takimit, Putin nënvizoi se të gjitha këto kufizime dëmtojnë ekonominë dhe prodhuesit, ndaj të dyja vendet kanë rënë dakord për një zgjidhje komplekse të problemit.

“Ne mund të themi tani, me bindje të plotë, se procesi i shërimit të marrëdhënieve ruso-turke ka përfunduar dhe ne po kthehemi te ndërveprimi normal mes partnerësh”, tha Putin.

Presidenti rus shtoi se kufizimet në të gjitha fushat tregtare do të hiqeshin, me përjashtim të atij për domatet e importuara nga Turqia, që do të mbetet në fuqi derisa prodhuesit rusë të marrin veten pas investimeve të bëra.

Erdogan pranoi se akordi është arritur edhe për çështje të tjera. Putin dhe Erdogan kanë diskutuar për mënyrat e mundshme të zgjidhjes së krizës në Siri dhe përsëritën premtimet për të punuar së bashku për të zgjidhur konfliktin në vendin e rrënuar nga lufta.

Dy presidentët mbështetën idenë e krijimit të zonave të sigurta në Siri, një propozim ky i mbështetur edhe nga presidenti amerikan Donald Trump.

Top Channel