Duterte, mesazh Trumpit: Me ngadalë me Korenë e Veriut

29/04/2017 00:00

Presidenti filipinas, Rodrigo Duterte i ka dërguar një mesazh homologut amerikan Donald Trump, ku e fton të shmangë përshkallëzimin e tensioneve me Korenë e Veriut.

“Kjo, jo si shenjë dorëzimi, por për të shmangur rrezikun e një holokausti bërthamor që mund të përfshijë të gjithë Azinë”, ka thënë Duterte.

Duke folur në përfundim të samitit vjetor të vendeve aziatike, Duterte ka nënvizuar se Shtetet e Bashkuara, si një fuqi e madhe botërore, duhet të tregohen “të kujdesshëm dhe të duruar” e jo të bien pre e provokimeve të liderit koreano-verior.

“Sepse këtu po luajmë me dikë që i pëlqen të lëshojë raketa”, ka thënë Duterte, i cili ka shtuar se së shpejti ka në plan një bisedë telefonike me Trump.

Një ditë më parë, regjimi komunist në Penian kreu testin e radhës të raketës balistike, që siç raportuan mediat ndërkombëtare, rezultoi i dështuar.

Presidenti Trump testin në fjalë e cilësoi një “mungesë respekti ndaj Kinës”.

Top Channel