Dhuna në Maqedoni, LSDM: Krimet, porosi e VMRO

Për të dikustuar krizën, presidenti Gjorgje Ivanov ka thirrur një mbledhje urgjente me liderët politikë, të cilët pas incidenteve të dhunshme në Parlament kanë vazhduar t’i drejtojnë gishtin njëri-tjetrit.

LSDM, lideri i së cilës Zoran Zaev u gjakos nga protestuesit e dhunshëm që pushtuan Parlamentin, tha se askush nuk do t’i shpëtojë përgjegjësisë për atë që ndodhi.

Social-demokratët maqedonas thanë se dhuna është pasojë e nxitjeve që i ka bërë asaj Nikolla Grueksvi dhe presidenti Ivanov, që shkaktojnë provokime dhe duan ndarje e urrejtje.

“Do të përgjigjen për rrezikimin e jetës të gjithë ata që kanë marrë pjesë në dhunën në Parlament, si dhe për të gjitha krimet e porositura dhe të zbatuara nga kryesia e VMRO-DPMNE-së”, tha dje me anë të një komunikate LSDM-ja.

Plotësisht i kundër reagimi i vetë Gruesvkit, i cili padyshim dënoi dhunën, por përgjegjësit i sheh përballë tij.

“Zgjedhja e jashtëligjshme e kryetarit të Kuvendit nga LSDM dhe partitë që e mbështesin, duke shkelur procedurat ligjore, kontribuoi në rritjen e tensionit dhe shpërthimin e dhunës”, deklaroi Gruevski.

Vetë i zgjedhuri Talat Xhaferri, i cili ka mbështetjen e ndërkombëtarëve, në reagimin e tij fajësoi drejtpërdrejtë presidentin Ivanov për situatën e krijuar, ndërsa falenderoi shqiptarët që nuk ranë pre e provokimeve.

Ndërkohë, aktori i heshtur i kaosit në Parlament, policia maqedonase duket se do të mbajë përgjegjësinë e saj për trazirat.

Ministri i Punëve të Brendshme, Agim Nuhiu tha se vlerësimet e para tregojnë që policia nuk ishte ishte në lartësinë e duhur dhe do të kërkohet llogari nga ata që nuk bënë detyrën.

Top Channel