Gjendja kaotike, rrëfimi i Princit Harry…

Në një intervistë me “Daily Telegraph”, ai tha se deri në fund të të 20-ave, ai nuk arrinte të ndiente dhimbjen për të ëmën, gjë që e ndieu vetëm pas dy vitesh kaosi total dhe pasi arriti deri në pikën e shkatërrimit të plotë.

32-vjeçari Harry thotë se edhe boksi e kishte ndihmuar, pasi nëpërmjet tij arrinte të nxirrte jashtë zemërimin. Sipas “the Telegraph”, Harry ka vendosur të flasë për të shkuarën e tij, me shpresën se do të mund të inkurajonte njerëz të tjerë të thyejnë tabutë që rrethojnë çështjet e shëndetit mendor.

Bashkë me të vëllanë dhe kunatën, Dukën dhe Dukeshën e Kembrixhit, ai po promovon fushatën e shëndetit mendor, “Heads Together”.

“Unë mund të them me siguri se, pasi humba mamanë kur isha vetëm 12 vjeç, mbylla të gjitha emocionet e mia për 20 vitet në vazhdim. Kjo kishte pasoja serioze, jo vetëm në jetën time personale, por edhe në punën time. Kam qenë shumë afër rrënimit në disa raste”, thotë ai.

Diana, Princesha e Uellsit, humbi jetën në një aksident rrugor në Paris, në gusht të vitit 1997.

“Mënyra sesi unë u përballa me këtë fakt, – rrëfen Harry, – ishte të fshihja kokën si struci në rërë, duke refuzuar madje edhe të mendoja për të… Thoja me vete, kjo vetëm do të të bëjë më të trishtuar, nuk do të mund ta kthej pas atë. Pra, në aspektin emocional, unë mendoja se kështu është mirë, nuk duhet të ndiesh asnjë emocion”, thotë ai, duke shtuar se kishte vendosur të ndryshonte vetëm pasi i vëllai William i kishte thënë: Dëgjo, duhet të përballesh me këtë. Nuk është normale të mendosh se nuk të ka ndodhur asgjë.

Pas kësaj, Harry vendosi të kërkonte ndihmë të specializuar nga një psikolog. E falë procesit nëpër të cilin ka kaluar dy vitet e fundit, ai thotë se tani është në gjendje të marrë punën e tij seriozisht, ta marrë jetën private seriozisht, si dhe të angazhohet me forcë për kauzat e rëndësishme.

Top Channel