Shumë gjermanë nuk e konceptojnë dot të dielën e Pashkëve pa vezët e çokollatës, por në qytezën e Horhausenit, njerëzit e kaluan festën duke hedhur vezë të vërteta, një traditë kjo që daton disa dekada më parë.

Vendasit e sfiduan shiun për të mos humbur garën e vezëve të zbukuruara, të cilat duhen hedhur sa më larg që të jetë e mundur, por pa u thyer. Konkurrimi është një shfaqje e përvitshme tejet popullore.

“Mendoj se është diçka shumë e veçantë të shohësh sesi në këto kushte atmosferike, njerëzit sërish dalin për të marrë pjesë në garë. Shfaqjen e zhvillojmë çdo vit. Ne pranojmë të vegjël e të mëdhenj, kushdo që ka dëshirë mund të marrë pjesë. Ka gjithashtu edhe ushqime shumë të mira. Hedhja e vezëve të Pashkëve është një moment shumë special për ne”, tha Thomas Schmidt, kryetar i Bashkisë.

“Është një traditë e thjeshtë që i përket Horhausenit. Ekziston prej shumë vitesh tashmë. Nuk do të gjeni asgjë të ngjashme me të, në të gjithë zonën”, tha Agathe Baecker, banore e zonës.

Secilit konkurrent i lejohet të hedhë vetëm një vezë. Në përfundim të garës, vezët u shpërndahen pjesëmarrësve, ndërsa ato pak që thyhen bëhen ushqim për zogjtë.

Top Channel