Eliminatoret e Botërorit, fitojnë Brazili dhe Argjentina

Në Montevideo, “Seleçao” iu imponua asaj të Oscar Tabarez që nuk kishte në dispozicion Luis Suarez, me rezultatin 4-1, duke e çuar në 7 pikë diferencën me të. Ishte pikërisht Uruguaji ai që e nisi më mirë sfidën, teksa kaloi në avantazh me golin e Cavanit nga pika e bardhë e 11-metërshit.

Por, Brazili e ktheu situatën në favorin e tij, duke barazuar në minutën e 18 me Paulinhon. Ky i fundit u bë protagonisti absolut i 5 herë kampionëve të Botës pasi arriti të gjejë golin edhe në minutat 51 dhe 92, ndërkohë që gjeti rrugën e rrjetës edhe Neymar.

Argjentina mori më në fund hakun ndaj Kilit për humbjet në finalet e Kupës së Amerikës në 2015 e 2016. Në “Riverplate Stadium” skuadra bardhekaltër fitoi me rezultatin e ngushtë 1-0 dhe tashmë e sheh veten në vendin e tretë në klasifikim me 22 pikë, 1 më pak se Uruguaji.

Fati i takimit u vendos në minutën e 16 të saj, kur Messi ktheu në gol një penallti shumë të dyshimtë të fituar nga Di Maria me Argjentinën, që mori 3 pikë të çmuara për kualifikimin në Botërorin e Rusisë.

Top Channel