“Bllokada elektronike”, Britania pason masat e SHBA

Kufizimet britanike, që përfshijnë edhe tabletët, DVD players dhe telefonat celularë mbi përmasa të caktuara, pasojnë një masë të ngjashme të marrë nga Shtetet e Bashkuara.

Amerika ka kufizuar pajisjet elektronike që mund të mbahen nga pasagjerët për 9 linja ajrore, nga 10 aeroporte, në 8 vende me popullsi kryesisht myslimane. Sipas Shteteve të Bashkuara, brenda këtyre pajisjeve elektronike mund të fshihen bomba.

Sipas medieve britanike është e qartë se lëvizja e Londrës është koordinuar me SHBA-të. Tentativa për të rrëzuar një avion pasagjerësh vitin e kaluar në Somali, u krye përmes një laptopi dhe duket se, masat e marra nga dy aleatët e vjetër kanë si qëllim të ndalin incindente të ngjashme.

Pajisjet e ndaluara në kabinë do të lejohen që të mbahen te bagazhet e tjera, në pjesën e poshtme të avionit. Ndërsa autoritetet thonë se ekstremistët kërkojnë mënyra gjithnjë e më inovative për të sulmuar, një pjesë e ekspertëve mendojnë se masat e marra për ndalimin e pajisjeve elektronike janë disi të paqarta, pasi nëse një bombë futet në një avion, pak rëndësi ka se në cilën pjesë të tij gjendet.

Top Channel