Plan kundër Trump? zv.Presidenti Pence: Absurde!

“Ka qenë nderi më i madh i jetës sime të shërbej në krah të Presidentit të 45-të të Shteteve të Bashkuara”, deklaroi Pence.

Supozimet e themeluesit të “Wikileaks”-it u pasqyruan me shpejtësi në mediet e huaja, së bashku me detajet që ai ofronte në mbështetje të pohimeve të veta.

Ish-Sekretarja e Shtetit dhe pretendentja për presidencën amerikane, sipas Assange e konsideron Pence “të parashikueshëm”, gjë që e bën atë një person i cili mund të mposhtet.

“Clinton është shprehur përpara një rrethi të ngushtë njerëzish se po bën fshehurazi përpjekje që pushtetin ta marrë numri dy i administratës”, lexohet në mesazhin e parë të Assange në “Twitter” mbi këtë çështje.

Në postimin e dytë, ai flet për dy oficerë të shërbimeve të inteligjencës, që janë shumë pranë Pence, e që po planifikojnë në mënyrë aktive vendosjen e tij në krye të qeverisë, ndonëse nuk është e qartë nëse “vet” numri dy i Shtëpisë së Bardhe është dakord.

“Bëhet fjalë për një lëvizje drejt shkarkimit të Trumpit e jo ndonjë veprimi tjetër”, sqaron Assange.

Reagimi i zëvendëspresidentit, megjithatë nuk lë shumë shteg për interpretime. “Kur shoh lidershipin e tij sot, – thotë Pence duke iu referuar qeverisjes së Trumpit, – kur shoh dhembshurinë që tregon çdo ditë për popullin amerikan, sajesa të tilla më duken krejtësisht të pavend. Jam i ngazëllyer nga progresi që kemi pasur në forcimin e këtij vendi, – shton ai, – në mbrojtjen e kombit dhe në ripërtëritjen e ekonomisë, e meritat për të gjitha i takojnë Presidentit Donald Trump”.

Top Channel