Përse emigrojnë bluzat e bardha?

“Janë shumë elementë që po na çojnë në një ulje galopante të mjekëve në vendin tonë, ulje për të cilën unë duhet të jap alarmin pasi brenda një 5-vjeçari sistemi shëndetësor shqiptar do të jetë në një kolaps të vërtetë”, deklaron doktor Tritan Shehu.

Urdhëri i Mjekut, ku bluzat e bardha që largohen tërheqin çertifikatën e sjelljes së mirë thotë se po barazohet numri i mjekëve që largohen me ata që diplomohen, duke futur këtu edhe ata që dalin në pension.

“Vitin e kaluar u larguan 156 mjekë, kur Fakulteti i Mjekësisë diplomoi 244, prej të cilëve 34 janë të specializuar. Zënë vendin e parë reanimatorët-anestezistë, obsetër-gjinekologët, kardiologët, ortopedët”, sqaron doktor Fatmir Brahimaj, drejtor i Urdhërit të Mjekut.

Mjekët thonë se largohen për karrierë dhe se opinioni për bluzat e bardha në Shqipëri është i njollosur, ndonëse situata disi ka ndryshuar.

“Rroga është shkaku kryesor, janë të pakëta. Pastaj theksojnë se vuajnë tërësisht krizën e besimit midis publikut dhe bluzave të bardha. Tregojnë Kodin Penal që i kërcënon në çdo moment”, thotë Brahimaj.

“Është edhe një element tjetër, tendenca për të inkriminuar mjekët nga ana ligjore, absolutisht e tejkaluar në dimensionet e saj”, shton nga ana tjetër Shehu.

Shehu dhe Brahimaj thonë se duhet rritur numri i mjekëve që specializohen.

Top Channel