Fier, vret të dashurën e më pas vetëvritet

Policia e gjeti 32-vjeçarin me një pistoletë TT në dorë me të cilën më parë kishte vrarë 29-vjeçaren e më pas kishte puthitur armën në kokën e tij dhe e kishte shkrehur.

Për policinë, ngjarja është vrasje dhe vetëvrasje, ndërsa arsyet janë ende të pazbardhura, megjithatë përmendet një histori dashurie mes dy të rinjëve.

Drini Derveni ishte i martuar dhe më fëmijë e po ashtu edhe Ermira Arapi. Vajza, me origjinë nga fshati Ngurrëz i Lushnjes, ishte edhe nënë e dy fëmijëve.

Ajo ishte kthyer nga emigrimi në Greqi dhe jetonte në shtëpinë e familjarëve të bashkëshortit, në fshatin Çlirim të Lushnjes. Ata që e njihnin tregojnë se 29-vjeçarja jetonte e vetme pasi i shoqi ndodhet ende në emigracion.

Ata ishin duke udhëtuar në rrugën Fier-Hoxharë në drejtim të bregut të detit dhe sapo kanë kaluar një urë, rreth orës 11:00 të kësaj të premte, mjeti tip “Jeep” ka dalë në anë të rrugës afër fshatit Shën Pjetër, ku ka ndodhur edhe ngjarja e rëndë.

Për shkaqe ende të pazbardhura nga policia, Drini Derveni qëlloi me armën e tij bashkëudhetaren e më pas qëlloi edhe mbi veten. Policia e gjeti atë me armë në dore dhe shenja të qarta se kush e ka kryer krimin.

Policia ka mbledhur të dhënat dhe ka marrë në pyetje edhe familjarët e dy të rinjve nga Fieri dhe Lushnja për të zbardhur shkaqet që çuan dy të rinjtë drejt kësaj tragjedie.

Top Channel