Basti i humbur i tenistes Bouchard

Kur gjithçka po shkonte në mënyrën më të mirë të mundshme për “Falcons”, që në fund të pjesës së parë kryesonin 28-3, tenistja kanadeze guxoi në “Twitter” të parashikojë trumfin historik të Matt Ryan e pjesës tjetër të skuadrës.

Një parashikim që nuk u prit mirë nga të gjithë ndjekësit e saj në këtë rrjet social, madje njëri prej tyre arriti ta sfidojë, duke i kërkuar takim në rast fitoreje të “Patriots”, sfidë të cilën tenistja e pranoi pa asnjë hezitim.

Sigurisht, Bouchard nuk e priste atë përmbysje të rezultatit nga ana e New England dhe ishte e përgatitur për të fituar bastin, por Tom Brady, një prej “quarterback”-ëve më të mëdhenj në historinë e “NFL”-së, ia prishi festën.

Dhe si sportiste që është, Bouchard e pranoi humbjen, duke i kërkuar admiruesit që e sfidoi vendbanimin e tij, që rezultoi të ishte në Chicago. Ajo që mbetet për t’u kuptuar është nëse ky takim do të ndodhë apo jo dhe sesi do ta presë atë i fejuari i saj, lojtari i Hokejit, Jordan Caron, me të cilin Bouchard është e lidhur që nga viti 2015.

Gjithsesi, sido që të shkojë kjo histori, Bouchard nuk do të vendosë më bast për një ndeshje të “Super Bowl”, e sidomos kundër Tom Brady.

Top Channel