Dëbimi i myslimanëve nga SHBA, i kërkohet të rikthehet në Irak

27-vjeçarja nga Iraku, Marwa Nasradeen është një prej civilëve që kanë mundur të largohen nga Mosuli i kontrolluar prej militantëve të Shtetit Islamik. Marwa iu largua terrorit me dëshirën e vetme të udhëtonte drejt Amerikës, vendi ku ajo beson me forcë se njerëzit gëzojnë disa të drejta të patjetërsueshme.

Megjithatë, shpresat e vajzës për një jetë të re u dërrmuan me të mbërritur në destinacion. Dekreti i Trumpit i solli si dhuratë një vulë të madhe të kuqe në pasaportë, ku shkruhet “e anuluar”.

“Më kërcënuan, më thanë se po nuk u ktheva në Irak do të më dërgonin në burg për dy vite dhe nuk do ta shihja të fejurarin e askënd tjetër, derisa gjykatësi të shihte dosjen time e të merrte një vendim. U tremba. Isha krejt e vetme aty. Pranova të kthehem në Irak, por nuk dua të shkoj prapë atje. Iu deshën më pak se 5 sekonda që të plotësonin letrat e mia, të merrnin bagazhet, të më siguronin biletën e të më vendosnin në një avion që shkonte në Egjipt”, tha Marwa Nasradeen.

Nasradeen mbërriti më vonë në Erbil, kryeqyteti i rajonit kurd në Irak, teksa iu desh të paguante 800 dollarë për fluturimin e kthimit. Pavarësisht eksperiencës tronditëse, dy ditë më vonë mori sërish rrugën drejt aeroportit, me shpresën se këtë herë do të mund të zbresë në Nju Jork.

“Po ma ndaluan hyrjen sërish, do të vras veten. Nuk duroj dot më. Si mundën të më kthenin? Si mundën të ma anulonin vizën? Dokumentet e mia janë të gjitha të ligjshme”, tha Marwa Nasradeen.

Fati i 27-vjeçares, ashtu si dhe ai i shumë të tjerëve, tani varet nga vendimi që do të marrë Gjykata e Apelit në San Francisco.

Top Channel