“The Independent”: Trump ndërton mure, Mitrovica i shemb

Muri prej betoni në Mitrovicën etnikisht të ndarë, shkak i shtimit të tensioneve mes Kosovës dhe Serbisë, u rrëzua të dielën pas marrëveshjes së arritur mes qeverisë kosovare dhe minoritetit serb. Kompromisi u arrit falë ndërmjetësimit të Bashkimit Europian dhe Shteteve të Bashkuara. Policia ishte në gatishmëri të lartë, por puna e dy buldozerëve kaloi e pashoqëruar nga protesta apo trazira.

Kryeministri Isa Mustafa i falënderoi të gjithë banorët e Mitrovicës. “Nuk i hymë asnjë demonstrimi force ose populizmi”, ishin fjalët e tij. Ato që mbizotëruan në fund ishin metodat demokratike.

Heqjen e barrierës së ngritur në muajin dhjetor e përshëndeti edhe shefja e diplomacisë europiane, Federica Mogherini.

“Kemi parë zhvillime inkurajuese këto ditët e fundit, përsa i takon dialogut Kosovë-Serbi. Marrëveshja e arritur në Mitrovicë tregon se të dyja palët po demonstrojnë guxim dhe vizion me rrëzimin e mureve dhe përqëndrimin te ndërtimi i urave lidhëse”, tha Mogherini.

Për më shumë se dy muaj, çështja e murit nxiste vetëm debate e pakënaqësi. Autoritetet dhe partitë politike në Kosovë e patën cilësuar si një veprim që bie ndesh me marrëveshjen për liri të lëvizjes në qytetin e ndarë në dy pjesë, në veriun me shumicë serbe dhe jugun me shumicë shqiptare, ndërsa për shembjen e tij ishte miratuar edhe një rezolutë nga Parlamenti i Kosovës.

Top Channel