Skënderbeu, kampion edhe me tifozë

Top Channel ka mundur të sigurojë të dhënat zyrtare të numrit të tifozëve të pranishëm në çdo ndeshje. Me mbi 330.000 tifozë, korçarët kryesojnë klasifikimin e 4 viteve të fundit, duke fituar duelin me emrat e mëdhenj të historisë së futbollit shqiptar si Tirana apo Partizani.

Shifër e konsiderueshme, duke kujtuar që bëhet fjalë për një skuadër tifozët e së cilës gjithmonë paguajnë për ta parë ekipin e tyre dhe një e ardhur prej mbi 60 milionë lekësh në këto katër vite, ndikon ndjeshëm në arkat edhe të një klubi me shumë shpenzime si Skënderbeu.

Ndërkohë, Partizani i rikthyer ne Superiore me pretendimet në çdo vit për titullin kampion, gjendet në vendin e dytë sa i përket tifozëve që e kanë ndjekur në këto 4 vitet e fundit.

Mbi 320 mijë janë mbështetësit e skuadrës së kuqe që pavarësisht mungesës së trofeve, me sa duket i kanë mjaftuar fitoret e derbit për të mbajtur entuziazmin dhe që i ka shtyrë të kontribuojnë gjithashtu me mbi 55 milionë lekësh.

Në vendin e tretë të këtij klasifikimi është tifozëria e Tiranës, më spektakolarja edhe njëkohësisht kapricozja e Superiores.

Me një shifër shumë të përafërt me Partizanin, por me disa ndeshje të dënuara pa tifozë, bardheblutë renditen në vendin e tretë në klasifikimin e skuadrave me më shumë ndjekës. Edhe kontributi i tyre, nisur nga shifrat nuk është i pakët në arkat e klubit, por shpesh marrëdhëniet dhe rezultatet e munguara në vazhdimësi kanë sjellë kontradikta mes skuadrës dhe tifozërisë, e cila jo rrallë herë ka zgjedhur bojkotin ashtu si ka bërë tani edhe pse pas dy fazave të para të këtij viti bardheblutë janë skuadra më e ndjekur se Skënderbeu dhe Partizani.

Ndërkohë, varfëria dhe mungesa e interesit detyron shumë skuadra që ta lënë të lirë hyrjen nëpër stadiume, siç ndodh shpesh me Kukësin kryesues dhe sigurisht me skuadrat e fundit të renditjes të cilët në mungesë të rezultateve i joshin mbështetësit me hyrjen falas.

Top Channel