Reshjet e dëborës që kanë nisur këtë të hënë nuk kanë sjellë problem të mëdha në qarkullim, ku akset kryesore janë të kalueshme dhe në pjesë të caktuara kërkojnë përdorimin e zinxhirëve.
Reshje bore ka pasur në qarkun e Kukësit, Shkodrës, Dibrës, Elbasanit dhe Korçës.
Punonjësit e emergjencave, Policia e Shtetit dhe gjithë strukturat e angazhuara për përballimin e situatës, gjenden në terren për t’iu gjendur pranë qytetarëve e mjeteve në vështirësi.
Grupet e specialistët të OSHEE janë duke punuar për riparimin e defekteve në disa zona ku ka munguar energjia elektrike.
Në të gjitha zonat e prekura nga dëbora Drejtoria e Përgjithshme e Rezervave Materiale Shtetërore ka shpërndarë e ndihmave ushqimore dhe materiale. Ditën e sotme do të dërgohen ndihma në fshatrat Theth, Ketë, Çajë dhe Selishtë.
Situata në qarqe paraqitet si më poshtë:
QARKU SHKODËR
Në qarkun e Shkodrës të gjitha akset kombëtare janë të qarkullueshme pa probleme. Përdorimi i zinxhirëve është i nevojshëm në disa akse rurale të këtij qarku.
Të qarkullueshme me zixhirë janë akset rrugore Shkodër – Shllak – Temal ,Tamarë – Vermosh, Hadroj – Qafë – Bene ,Fushë Arrëz – Qafë Mali – Fierzë, Fushë Arrëz – Qafë Shllak, Qafë Çele – Pukë – F.Arrëz, Qafë Qerret – Qelëz- Bardhet – Iballë dhe Shkodër – Bregu Lumit – Theth
Aksi rrugor Shkodër – Theth është i kalueshëm deri në Qafë Thore
QARKU KUKËS
Të gjitha akset kombëtare në shkallë qarku qarkullohen pa zinxhirë, përjashtuar aksin rrugor Ura e Zapotit-Shishtavec.
Aksi rrugor për në Njësinë Administrative Arrën vazhdon i bllokuar.
Po punohet për hapjen e rrugëve që paraqesin probleme për lidhjen e fshatrave me qendrën administrative.
Në Njësinë administrative Gjinaj ka pasur probleme me furnizimin me energjinë elektrike.
QARKU DIBËR
Në akset rrugore Qafë Bualli – Peshkopi – Maqellarë – Bllatë, Kuben – Vasie, Ura e Qytezës – Zerqan dhe Ura e Çerenecit – Steblevë qarkullimi i mjeteve kryhet pjesërisht me zinxhirë.
Në aksin Qafë Bualli – Krastë, qarkullimi i mjeteve bëhet me zinxhirë.
Aksi rrugor rural Peshkopi-Lurë vazhdon të jetë i bllokuar, por kalimi i mjeteve kryhet nga aksi rrugor Kurbnesh- Lurë.
Për hapjen e akseve rrugore problematike po punohet me forca dhe mjete.
QARKU KORÇË
Në qarkun e Korçës të gjitha akset kombëtare janë të qarkullueshme. Aksi rrugor Korçë – Boboshticë – Dardhë është i kalueshëm me zinxhirë ndërsa aksi Korçë-Ersekë është i kalueshëm me zinxhirë në pjesë të caktuara.
Probleme me furnizimin me energji elektrike ka pasur në fshatin Mollas të bashkisë Kolonjë.
Në qarqet e tjera nuk raportohet për probleme
Top Channel