Bushati viziton Iranin, nuk flitet për muxhahedinët

Gjatë qëndrimit atje, ministri Bushati zhvilloi takime me Presidentin Ruhani, homologun e tij Zarif dhe zyrtarë të tjerë. Në takimin me Presidentin Ruhani, u ra dakord për të rritur bashkëpunimin në fusha me interes të përbashkët. Ministri Bushati shprehu vlerësimin për rolin e qeverisë iraniane dhe vetë Presidentit në arritjen e marrëveshjes për programin bërthamor të Iranit me aktorët ndërkombëtarë.

Ndërsa Presidenti Rouhani vlerësoi miqësinë mes dy popujve dhe nënvizoi rëndësinë e shfrytëzimit të potencialeve për të zhvilluar më tej marrëdhëniet. 

Në takimin me ministrin e Jashtëm, palët nënshkruan një memorandum mirëkuptimi për konsultimet diplomatike. Duke vlerësuar hapat për rigjallërimin e marrëdhënieve dypalëshe, dy ministrat ranë dakord mbi nevojën për të forcuar kuadrin ligjor të bashkëpunimit, në mënyrë të veçantë në fushën e shkëmbimeve tregtare, turizmit dhe kulturës.

Një ndër pikat më të rëndësishme në këtë takim, ka qenë Kosova. Ministri shqiptar i Punëve të Jashtme parashtroi kërkesën ndaj qeverisë së Iranit për njohjen e Kosovës. Ndërkohë, në këto takime që ministri zhvilloi në Lindjen e Mesme nuk është diskutuar për çështjen e muxhahedinëve, një çështje për të cilën Shqipëria angazhohet prej disa vitesh.

Top Channel