Mitrovicë, serbët në protestë kundër forcave speciale

Sheshi “Car Llazari” është vendi ku janë mbledhur ata, të cilët e cilësojnë këtë veprim si tentativë për të frikësuar popullatën serbe në këtë pjesë të vendit, raporton KTV.

Në anën tjetër në Serbi, në ndërtesën e Shtabit të Përgjithshëm të Ushtrisë së Serbisë, në orën 11:00 ka nisur mbledhja e Këshillit të Sigurisë Kombëtare, të cilin e ka thirrur e po e kryeson presidenti i Serbisë, Tomislav Nikoliç. Aty marrin pjesë edhe kryeministri Aleksandar Vuçiç; ministri i Mbrojtjes Zoran Djordjeviç; ministri i Brendshëm Nebojsha Stefanoviç; ministri i Drejtësisë Nela Kuburoviç; shefi i Shtabit të Përgjithshëm Ljubisha Dikoviç; si dhe drejtori i Policisë Vladimir Rebiç.

Kryeministri serb Aleksandar Vuçiç, gjatë konferencës së jashtëzakonshme për mediet të mbajtur mbrëmë, ka bërë të ditur se ka urdhëruar që treni i nisur dje nga Beogradi me destinacion Mitrovicën të kthehej mbrapsht, vetëm për të penguar një konflikt të gjerë të mundshëm.

“Shqiptarët kanë dërguar në veri, pa lejen e NATO-s dhe faktorëve të tjerë përkatës, 17 automjete të blinduara të tipit ‘Kobra’ me pjesëtarë të njësisë speciale, me qëllim provokimin e një konflikti të gjerë në atë pjesë të territorit”, ka thënë mes të tjerash Vuçiç.

Siç raporton gazetarja e “Telegrafit” nga vendi i ngjarjes, në protestë është i pranishëm edhe shefi i grupit parlamentar të “Listës Serbe”, Slavko Simiç. Veç tij, të pranishëm janë edhe Aleksandar Spiriç, kryetar ilegal i Mitrovicës, si dhe Stefan Bulloviç, kryetar i Zubin Potokut, Zoran Todiç, kryetar ilegal i Leposaviçit, Iva Todosijeviç, kryetar ilegal i Zveçanit.

Burime të “Telegrafit” bëjnë të ditur se qytetarë të shumtë kanë ardhur nga 4 komunat veriore të Mitrovicës.

Top Channel