Mes masash të rrepta sigurie, me mijëra të rritur dhe fëmijë të entuziazmuar u rreshtuan në të dy krahët e bulevardit kryesor të Madridit, për të parë duke kaluar plot pompozitet aktorët e veshur si 3 mbretërit biblikë, që udhëtuan për në Betlehem me dhurata për Jezu Krishtin.
Nga pluskueset shumëngjyrëshe, pjesëmarrësit e paradës u hodhën ëmbëlsira njerëzve që ndiqnin plot ngazëllim kremtimin e Epifanisë, dita kur Melkior, Baltazar dhe Kaspar vizituan Jezuin e porsalindur.
Tradicionalisht, në vigjiljen e Epifanisë, apo ditës së ujit të bekuar, parada të ngjashme zhvillohen në qytete dhe fshatra anembanë Spanjës. Në këtë vend ndodh shpesh që fëmijët të presin deri në 6 janar për të hapur dhuratat e tyre.
Sivjet, siguria u forcua ndjeshëm nga frika e ndonjë sulmi të ngjashëm me atë të Berlinit në muajin dhjetor. Për të parën herë, në Madrid u ngritën barriera në rrugë me qëllimin të shmangeshin incidente si ato të kryeqytetit gjerman dhe Nicës, ku agresorët në të dyja rastet i sulmuan me kamionë turmat e njerëzve të mbledhur për të festuar.
Automjeteve që peshonin mbi 3.500 kg iu ndalua hyrja përpara paradës në kryeqendrën e Spanjës e ky rregull mbeti në fuqi edhe pak pas përfundimit të saj.
Top Channel