Rusia ikën nga Siria, të parat largohen aeroplanmbajtëset

Njoftimi vjen pak ditë pasi Moska dhe Ankaraja negociuan armëpushimin sirian, që sipas Kombeve të Bashkuara po mban në masë të madhe. Për muaj të tërë, avionët bombardues rusë i kanë goditur ashpër nga ajri rebelët antiqeveritarë.

Përfshirja e Moskës në konfliktin e dhunshëm që gjunjëzoi Sirinë vishet me meritën e kthesës që mori lufta civile në favor të aleatit të Rusisë në rajon, presidentit Bashar al-Assad. Flotilja ruse e aeroplanmbajtëseve, e drejtuar nga ajo që konsiderohet si krenaria e saj, luftanija “Admirali Kuznetsov”, po përgatitet t’u largohet brigjeve siriane.

Vladimir Putin e kishte bërë të qartë në muajin dhjetor se është rënë dakord, që Rusia të nisë reduktimin e trupave të dërguara në Siri, sipas kushteve të pushimzjarrit të arritur mes grupeve opozitare siriane dhe regjimit të Assadit, me ndërmjetësimin e Moskës dhe të Turqisë.

Edhe marsin e kaluar, Rusia pati njoftuar një tërheqje të forcave të dislokuara në Siri, por sulmet e saj ajrore vazhduan me të njëjtin intensitet. “Grupi i aeroplanmbajtëseve e përmbushi misionin e tij”, deklaroi komandanti i forcave ruse në Siri, Andrei Kartapolov, i cili shtoi sidoqoftë se “Moska vazhdon të ketë në këtë vend kapacitete të mjaftueshme të mbrojtjes ajrore, falë sistemit të raketave S-300 dhe S-400, që ka dislokuar atje.

Top Channel