Takimi me shqiptarët, mbyllen negociatat në zyrën e kryeministrit

Për herë të parë, kryetari i Lëvizjes Besa dhe ai i BDI ulen në një tryezë bashkë, pas refuzimit që Kasami i kishte bërë ftesës së Ahmetit një javë më parë. Burime nga ky takim shprehen shumë të rezervuara në dhënien e detajeve, por e vetmja gjë që deklarojnë është se takimi ka shkuar mirë dhe ka qenë i frytshëm.‎

Por se sa i frytshëm ka qenë realisht ky takim, mbetet për t’u parë gjatë ditëve në vijim. Të njëjtat burime konfirmojnë se Kryeministri Rama ka përsëritur dhe njëherë qëndrimin e Qeverisë shqiptare, se faktori shqiptar duhet të flasë me një zë të vetëm në funksion të vendosjes së kushteve të Marrëveshjes së Ohrit në programin e cilësdo qeverie që do të krijohet. Gjatë qëndrimit në Tiranë, kreu i BDI-së, Ali Ahmeti është takuar dhe me Presidentin Bujar Nishani. Në njoftimin e shpërndarë nga Zyra e Shtypit e Presidencës, thuhet se në takim u diskutua mbi situatën postzgjedhore dhe rolin e BDI-së.

Tashmë mbetet për t’u parë pas mbledhjes së Parlamentit të Maqedonisë të premten, se si do vijojnë konsultimet mes partive.

Mësohet së LSDM-ja u ka ofruar partive shqiptare një sërë postesh të rëndësishme në qeveri, përfshi dhe kryetarin e Kuvendit.

Nga ana tjetër, VMRO DPMNE ka kërkuar që partitë shqiptare, e më së shumti BDI-së të shprehet hapur mbi qëndrimin e saj, por kjo e fundit ka kërkuar që të plotësohen më parë kërkesat e tyre.

Gruevski dhe partia e tij, kanë 20 ditë kohë për të formuar qeverinë, që në momentin që Presidenti Ivanov e mandaton atë. Në rast se nuk e arrin një gjë të tillë, atëherë do t’i takojë Zoran Zaev-it të nis punën për formimin e qeverisë.

Top Channel