“Kamikazi” në furgon i devijon timonin shoferit. Pasagjerët e “arrestojnë”

Ngjarja e rëndë, që mund të kishte përfunduar tragjikisht, ndodhi paraditen e së dielës në autostradë, pranë fshatit Blerimaj të Kavajës. Në furgonin që ishte nisur nga Tirana, në drejtim të qytetit të Vlorës, 48-vjeçari ka qenë i ulur në sediljen e parë dhe, pasi ka thënë “Më njihni ju mua, unë ju vras të gjithëve”, ka kapur timonin duke devijuar drejtimin e mjetit që u përplas me trafikndarësen.

Falë rezistencës së shoferit, furgoni nuk doli nga rruga, ndërsa pasagjerët, të cilët fatmirësisht nuk u lënduan, mbajtën agresorin deri në mbërritjen e forcave të policisë, të cilët e arrestuan.

Burime nga policia njoftojnë se sjelljet e çudishme të 48-vjeçarit kanë vijuar edhe gjatë natës në mjediset e paraburgimit, ku Rrapaj ka shfaqur paqëndrueshmëri si në të folur dhe në qëndrim.

Uniformat blu përjashtojnë mundësinë që Rrapaj të jetë person me prirje ektremiste fetare, nisur edhe nga informacioni që kanë dhënë familjarët e tij. Policia po heton mbi të kaluarën e 48-vjeçarit, i cili mësohet se ka jetuar për disa kohë në Gjermani.

Ndaj tij tashmë rëndon akuza e “Vrasjes në rrethana cilësuese, mbetur në tentativë”.

Top Channel