SHBA: Snowden, ende në kontakte me spiunazhin rus

Komiteti për çështjet e kundërzbulimit në Dhomën e Përfaqësuesve publikoi raportin për të dhënë atë që kreu i këtij paneli e quajti “një shpjegim të plotë të krimeve të Edward Snowden dhe shpërfilljen e pamasë që ai ka treguar ndaj sigurisë kombëtare të Shteteve të Bashkuara”.

Në një shembull të rrallë të votimit bipartizan, kreu republikan dhe ai demokrat i panelit u bashkuan në qortimin e Snowdenit, i cili në vitin 2013 zbuloi përpjekjet e qeverisë amerikane për të piratuar të dhënat e naftësjellësve të drejtuara nga kompanitë amerikane për t’iu shërbyer klientëve të huaj. Programet përgjuese mblidhnin të dhëna të plota dhe të pjesshme telefonike të miliona amerikanëve dhe ekzaminonin “e-mail”-et e tyre.

Snowden u arratis drejt Hong Kongut pas publikimit të tyre, e më pas përfundoi në Rusi për të shmangur hetimin penal ndaj tij.

Kreu republikan i komitetit, Devin Nunes tha se “do të duhet një kohë e gjatë për të zbutur dëmet” e shkaktuara nga Snowden. Ndërsa kryesuesi demokrat i komitetit, Adam Schiff tha se Snowden nuk është një informator apo denoncues, siç pretendon vet ai apo edhe mbështetësit e tij.

“Shumica e materialeve të vjedhura prej tij nuk kanë të bëjnë aspak me privatësinë e amerikanëve, ndërsa kompromentimi i tyre ka qenë një fitore e madhe për kundërshtarët e Amerikës dhe atyre që duan t’i bëjnë keq vendit tonë”, tha Schiff.

Publikimi i raportit vjen në një kohë kur komuniteti i shërbimeve sekrete amerikane ka akuzuar Rusinë për ndërhyrje në zgjedhjet presidenciale amerikane. Mbështetësit e Snowdenit kanë nxitur presidentin Barack Obama ta falë atë, përpara se të largohet nga Shtëpia e Bardhë në fund të janarit. Por detajet në raportin e komitetit të shërbimeve sekrete, së bashku me fokusin intensiv ndaj piratimit të Rusisë të “e-mail”-eve të demokratëve, mund ta pengojë nxitjen për falje.

Lisa Monaco, këshilltarja e Obamës për Sigurinë Kombëtare dhe Antiterrorizmin, tha vitin e kaluar se Snowden “duhet të kthehet në Shtetet e Bashkuara dhe të gjykohet nga një juri e kolegëve të tij, e jo të fshihet pas mbulimit që i jep një regjim autoritar. Aktualisht ai është duke u përpjekur t’u shmanget pasojave të veprimeve të tij”.

Top Channel