Fjalimi para kombit, Putin: Rusia nuk kërkon të bëjë armiq

01/12/2016 00:00

Në fjalimin e tij të përvitshëm nga Kremlini, për Parlamentin dhe kombin rus, presidenti Vladimir Putin ka bërë të ditur se Rusia “nuk kërkon konflikte me asnjë”.

“Ndryshe nga disa kolegë të huaj të cilët e shohin Rusinë si armike, ne nuk synojmë – dhe nuk e kemi bërë kurrë, – të krijojmë armiq. Ne kemi nevojë për miq”, tha ai. Megjithatë “ne nuk do të lejojmë kurrë që të preken apo të dëmtohen interesat tona”, shtoi më tej Putin.

Presidenti deklaroi se Rusia është e gatshme të punojë me administratën e re amerikane në luftën kundër terrorizmit. Ai ka bërë të ditur kohët e fundit shpresën e tij për marrëdhënie më të mira me Shtetet e Bashkuara, menjëherë pasi presidenti i zgjedhur Donald Trump të marrë drejtimin e Shtëpisë së Bardhë.

Ai lavderoi kurajon e personelit ushtarak rus që lufton grupet e rebelëve në Siri, në mbështetje të presidentit Bashar al-Assad, duke shkaktuar kështu duartrokitje të forta në sallën e zbukuruar të Kremlinit.

“Sigurisht që dua të mbështetem në përpjekjet e përbashkëta me SHBA-të për të luftuar realisht kërcënimet – dhe jo ato të fabrikuara, – që vijnë nga terrorizmi ndërkombëtar”, tha ai.

Putin paralajmëroi gjithashtu se çdo përpjekje për të “thyer barazinë strategjike” do të ishte një katastrofë globale, duke iu referuar këtu me të gjitha gjasat balancave bërthamore mes Rusisë dhe Shteteve të Bashkuara.

Politikanë amerikanë dhe europianë kanë kritikuar fushatën e bombardimeve të rënda të Rusisë në Siri, veçanërisht në Aleppo. Ata thonë se Rusia duhet të godasë më ashpër militantët e Shtetit Islamik, në vend që të mbështesë forcat besnike të Bashar al-Assadit, të cilin e akuzojnë për abuzime të rënda me të drejtat e njeriut.

Putin tha gjithashtu se do të tentojë marrëdhënie më të mira me disa vende të BE-së, pavarësisht sanksioneve të vendosura ndaj Moskës për shkak të ndërhyrjes së Rusisë në Ukrainë.

Ai foli për një partneritet Euroaziatik më të zgjeruar, të udhëhequr nag Rusia, teksa tha se “është i bindur që një bisedë e tillë është e mundur me shtetet e Bashkimit Europian, ku ka kërkesa në rritje për një kurs të pavarur dhe subjektiv, politik dhe ekonomik. Dhe këtë e shohim në rezultatet e zgjedhjeve”.

Shumica e fjalimit të tij u fokusua në sfidat ekonomike dhe sociale të Rusisë. Sa i përket korrupsionit, ai tha se “është kthyer në një praktikë të pafatë për të nxitur një valë mediatike përreth të ashtuquajturave raste të profilit të lartë”. “Lufta ndaj korrupsionit nuk është thjesht një shfaqje e radhës”, deklaroi ai.

Putin tha gjithashtu se Rusia po ndërmerrte edhe futjen e një sistemi të shkëlqyer antidoping, pas skandalit që e përfshiu këtë shtet në Lojërat Olimpike të Rios. Një goditje shqetësuese për sportin rus, pasi atletët e këtij vendi u ndaluan të konkurronin në Olimpiadën e 2016-s, për shkak të akuzave për doping.

Top Channel