Protesta në Brazil, manifestuesit kërkojnë kthimin e regjimit ushtarak
17/11/2016 00:00
Debat në OKB: Gjenocidi në Srebrenicë të dënohet globalisht 19/04 18:42
Protesta masive janë zhvilluar në Brazil, me manifestuesit që kanë hyrë me forcë në dhomën e ulët të Kongresit në kryeqytetin Brazilia.
Të paktën 40 protestues janë përleshur me agjentët e sigurisë dhe kanë arritur të zaptojnë podiumin, ku kanë kërkuar rikthimin e regjimit ushtarak, që qeverisi Brazilin nga viti 1964 në 1985.
Demonstruesit kanë kaluar agjentët dhe kanë thyer një derë prej xhami për të hyrë në dhomën e Parlamentit, ku kanë bërtitur “duam gjeneralët, duam gjeneralët” dhe kanë kënduar himnin kombëtar.
Policisë i janë dashur tre orë për të rrethuar protestuesit, të cilët më pas janë arrestuar të gjithë, raporton agjencia e lajmeve “Reuters”.
Më vonë gjatë ditës, zëdhënësi i presidentit Michel Temer, Alexandre Parola e cilësoi protestën një “fyerje” dhe tha se zhvillimi i saj “shkeli të gjitha normat e bashkjetesës demokratike”.
“Kjo është diçka shqetësuese që duhet të shërbejë si një paralajmërim. Po kthehemi në epokën e ekstremistëve”, komentoi ndërkohë deputeti Betinho Gomes.
Besimi publik në institucionet në Brazil është gërryer kohët e fundit për shkak të skandalit të korrupsionit masiv ku ishte përfshirë edhe ish-presidentja Dilma Rousseff.
Në Rio de Zhaneiro ndërkohë, policia ka përdorur gaz lotësjellës ndaj punonjësve të sektorit publik, që manifestonin kundër shkurtimeve.
Top Channel
