“Jo taksë për makinat me gaz”, ministri i Mjedisit kundër rritjes së akcizës

“Do kërkoja që të paktën ky zë në paketën fiskale të rishikohet. Nuk po them të subvencionohet, por s’mund t’i vihet akcizë pasi janë rreth 3 për qind e automjeteve që sot përdorin gazin e lëngshëm dhe nuk besoj se prishen ekuilibrat”, deklaroi Koka.

Sipas minisrit të Mjedisit, ky taksim shkon në kundërshtim me politikat dhe angazhimet për uljen e ndotjes nga djegia e karburanteve.

“Po ta shohësh si shifër, nëse kemi thënë se do investohen deri në vitin 2030 miliona euro dhe në këtë zë është rreth 100 milionë euro, presupozohet investim nga privatët. Çka do të thotë që çdo qytetar që disponon një automjet monton një impiant gazi që e blen me kosto të ulët dhe në këtë rast ne duhet t’i stimulojmë dhe jo t’i vendosim akcizë”, nënvizoi Koka.

Në paketën fiskale qeveria ka parashikuar vendosjen e një akcize prej rreth 13 lekë për litër për gazin e lëngshëm që përdoret nga automjetet dhe duke përjashtuar atë për ngrohje.

Sipas Ministrisë së Financave, një masë e tillë është në harmoni me direktivat e Bashkimit Europian.

Top Channel