Arrestimet në Turqi, opozitarët prokurdë dhe BE-ja i dënojnë

“HDP” bëri të ditur se arrestimet shënuan një ditë të zezë për vendin, ndërsa mbështetës të shumtë të kësaj force politike dolën në rrugë për të protestuar dhe u ndeshën me policinë.

Dy udhëheqësit e “HDP”-së, Selahattin Demirtas dhe Figen Yuksekdag, akuzohen se kanë bërë propagandë për militantët që luftojnë kundër shtetit turk. Ata dhe 10 aktivistët e tjerë të arrestuar të “HDP”-së kanë mohuar çdo lidhje me grupin rebel kurd “PKK”.

Të gjithë ata u arrestuan, sepse refuzuan që t’u përgjigjeshin pyetjeve të prokurorëve për këto akuza.

E ndërsa policia përleshej me protestues të shumtë në Stamboll, Ankara dhe qytete të tjera për shkak të arrestimeve, zyrtarë të “HDP”-së thanë se qeveria turke kërkon t’i japë fund Parlamentit dhe të krijojë një Turqi autoritare pa opozitë demokratike.

Arrestimet e krerëve kurdë u dënuan ashpër nga BE-ja dhe Gjermania. Zyrtarë europianë shprehën shqetësimin e tyre për situatën dhe thanë se, me arrestimin e opozitës, Turqia s’mund të jetë në rrugën drejt BE-së.

Disa orë pas arrestimit të Demirtas dhe krerëve të tjerë kurdë, një bombë shpërtheu në qytetin Diyarbakir, duke vrarë 9 persona dhe duke plagosur dhjetëra të tjerë.

Demirtas ka marrë mjaft mbështetje ndërkombëtare për politikat e tij liberale, por kritikët thonë se nuk ka arritur ta distancojë sa duhet partinë e tij “HDP” nga partia e shpallur e jashtëligjshme e Punëtorëve të Kurdistanit.

Top Channel