PD, Alibeaj: Rama mbron Balilajn për hir të parave

Në një deklaratë për shtyp, Alibeaj ka deklaruar se, edhe pse i shpallur në kërkim ndërkombëtar dhe i skeduar si “Eskobari i Ballkanit”, dje, “me gjuhën e Edi Ramës”, Balilaj tha se për këtë fajin e ka Saliu.

“Ndonëse për Balilajn ka një urdhër arresti, Edi Rama i jep mbrojtje, nuk e arreston, madje e ruan me shefat e tij të policisë, ndërsa ai pushon në hotelin e tij luksoz në Sarandë. Kaq i rëndësishëm është Balilaj për Edi Ramën, sa sipas tij shpallja në kërkim si koka e trafikut të drogës në Ballkan është komplot “amerikano-grek”, kundër Edi Ramës. Dhe s’ka faj, në shtetin e Edi Ramës nuk e di ku fillon krimi e ku mbaron shteti, ku fillon shteti e ku mbaron krimi”, ka deklaruar Alibeaj.

Ai është shprehur se, “propaganda e Edi Ramës e nxorri Balilajn shenjtor, por meqë është kaq i pafajshëm, meqë atij dhe Edi Ramës po i bien në qafë opozita, Agjencia Amerikane e Antidrogës, DEA, policia greke, pse nuk ia dorëzon drejtësisë që të vërtetojë pafajësinë e tij?”.

“Agjencia Amerikane e Antidrogës, DEA dhe policia greke kërkojnë arrestimin e Balilajt, por Edi Rama nuk e arreston dot. Sepse ai është peng i krimit dhe i trafikut të drogës. E sollën në pushtet, po e mbajnë në pushtet dhe shpreson se do t’i garantojnë pushtet. Për para dhe pushtet, Edi Rama është gati të bëjë gjithçka, ta bëjë dhe hero “Eskobarin e  Ballkanit”, Klement Balilajn”, ka shtuar Alibeaj.

Top Channel