Basha: Kushtet tona, dekriminalizimi dhe zgjedhjet e lira

Nga ana e tij, Basha tha se, kjo situatë është pasojë direkte e inkriminimit të shtetit. Ai tha se, kriminelët dhe trafikantët kryeministri i futi në Parlament dhe administratë dhe pasi u hapi rrugët e drogës, qytetarëve u la si zgjidhje vetëm varfërinë dhe emigracionin.

“I hapën dyert krimit, i kandiduan për deputetë, i futën në Parlament, i bënë kryetar bashkish, por nuk u mjaftuan. I bënë drejtorë në administratë, i bënë shefa komisariatesh e drejtorë krimesh si këtu në Burrel. Efekti kulminant i kësaj politike të pastër të inkriminimit të shtetit është mbulimi i gjithë sipërfaqes së vendit nga droga”, tha Basha.

Sipas tij, mbulimi i vendit me drogë është projekt politik i Edi Ramës.

“Ky njeri jo vetëm nuk mbajti premtimet me të cilat erdhi në pushtet, por që në ditën e parë i braktisi ato, nuk u përpoq t’i mbante, nuk kishte ndërmend t’i mbante. Tani që ditët e mandatit po i mbarojnë e kemi fare të qartë se çfarë kishte ndërmend. Kishte ndërmend që buxhetin ta mbante për vete dhe për një grusht miqsh, që krimit që e solli në pushtet dhe e mban në pushtet t’i hapte dyert e drogës dhe që popullin ta vinte përpara disa alternativave: varfëri, emigracion, burg ose argat në kooperativën e drogës së tij dhe shokëve tëtij”, tha Basha.

Ai theksoi se, me Edi Ramën nuk mund të ketë zgjedhje dhe artikuloi kushtet e patjetërsueshme për opozitën. “Dy janë kushtet e patjetërsueshme: zbatimi i ligjit të dekriminalizimit dhe zgjedhjet e lira dhe të ndershme”, shtoi Basha.

Top Channel