Tërmetet godasin Italinë. Panik i madh në shumë zona

Gjatë natës u evakuua godina madhështore e Ministrisë së Punëve të Jashtme. Mbrojtja Civile bën të ditur se përveç mijëra personave që kaluan natën jashtë banesave nga frika e lëkundjeve, llogaritet që rreth epiqendrës kanë mbetur pa strehë shumë më shumë persona sesa ata që humbën shtëpitë pas tërmetiti të 24 gushtit, po në këto zona.

Aktualisht flitet vetëm për 8 të lënduar, por problemi kryesor mbetet strehimi sepse çadrat tani për tani nuk janë zgjidhja e përshtatshme. Në këto komuna të vogla shumica e banorëve janë të moshuar dhe dimri është në prag. Në zonat e tërmetit sot janë mbyllur shkollat, evakuuar spitalet e burgjet, një pjesë e rrugëve janë bllokuar nga rënia e shkëmbinjve.

Popullata sapo kishte nisur të mëkëmbej nga tërmeti i mëparshëm, prandaj mendohet që këtë herë do të jetë akoma më e rëndë si nga ana materiale, ashtu edhe nga ajo psikologjike.

Gjatë natës dhe mëngjesit janë regjistruar rreth 200 lëkundje. Sipas specialistëve është ulja e Apenineve që mund të ketë sjellë këto lëvizje sizmike. Një situatë që rrezikon të përsëritet e të zgjatet në kohë.

Top Channel