Koreja e Veriut, tjetër testim i dështuar raketor

Raketa besohet të ketë qenë një “Musudan” me rreze të mesme veprimi dhe u lëshuar nga qyteti perëndimor i Kusongut, aty ku vendi i izoluar komunist u përpoq por dështoi të lëshonte një tjetër raketë të të njëjtit lloj ditën e shtunë.

Lëshimi i raketës erdhi vetëm pak pasi Shtetet e Bashkuara dhe Koreja e Jugut u rakorduan në Uashington për të forcuar përpjekjet diplomatike dhe ushtarake në kundërshtim të programeve bërthamore e raketore të Koresë së Veriut, të cilat po ndërmerren në kundërshtim të hapur me rezolutat e Këshillit të Sigurimit të OKB-së.

“Ne dënojmë me forcë aktet e vazhdueshme të paligjshme provokuese të Veriut”, bëri të ditur shefi i Shtabit të Përgjithshëm të Koresë së Jugut në një deklaratë. Japonia e dënoi gjithashtu këtë testim dhe tha se do t’i dorëzonte një notë proteste formale Veriut përmes ambasadës së saj në Pekin.

Lëshimi i dështuar i raketës shënon edhe përpjekjen e 8 në 7 muajt e fundit nga Veriu komunist, kryesisht për lëshimin e një rakete me rreze prej afro 3.000 km, që lëshohen nga një makineri lëvizëze.

Koreja e Veriut ka vijuar të ndjekë me një shpejtësi të paprecedentë programet e saj bërthamore e raketore gjatë këtij viti. Në qershor, vendi i izoluar lëshoi një raketë “Musudan” që fluturoi rreth 400 km, më shumë sesa gjysma e distancës me Japoninë, një test që u konsiderua si sukses nga zyrtarët dhe ekspertët në Korenë e Jugut dhe Amerikë.

Koreja e Veriut njoftoi këtë të enjte se do të vazhdojë lëshimin e satelitëve, pavarësisht kundërshtimit të rivalit të saj jugor, përmes një deklarate të lëshuar nga agjencia e saj hapësinore, të transmetuar nga media shtetërore.

Top Channel