Serbisë i janë shtuar kushte të reja, sa i përket negociimit të “kapitullit 35” me Bashkimin Europian. Të paktën kështu thonë burime diplomatike nga Brukseli për median serbe “Politika”.
Sipas kësaj medieje, Brukseli ka vendosur kërkesa shtesë në formën e kritereve të përkohshme në një dokument 6-faqesh, në lidhje me heqjen e institucioneve paralele dhe lidhjen e tyre me fillimin e Asociacionit të Komunave serbe.
“Serbia do të duhet të dorëzojë çdo tre muaj raportin e pagesave të pensioneve për ish-anëtarët e policisë dhe gjyqtarëve paralelë, që tashmë janë nën institucionet e Kosovës, për të cilët nuk ka asnjë marrëveshje”, shkruan ndër të tjerash “Politika”.
Për Beogradin janë të diskutueshme veçanërisht dy pika, sipas medias në fjalë: fakti se kush do të vendosë për menaxhimin në Gazivodë dhe liria e lëvizjes.
“Beogradi, – siç na thuhet nga burime të afërta me ekipin negociator, – nuk ka pranuar të lejojë hyrjen e shtetasve të vendeve të treta nga Kosova në Serbi, sepse kjo do të thotë që Beogradi njeh Kosovën”, shkruan në fund “Politika”.
Top Channel