Në kulmin e debatit për ekzistencën e një raporti sekret për kanabisin në Shqipëri, ministri i Brendshëm, Saimir Tahiri ka përfshirë në atë që ai e cilëson “Frontin e së keqes” edhe organin e akuzës. Përveç Prokurorisë, Tahiri flet edhe për media të caktuara që synojnë të baltosin punën e Policisë së Shtetit.
“Jam shumë i bindur se sot ka pak nga ata që mendojnë se “Fronti i të keqes” është vetëm brenda SHQUP-it, ka shkuar shumë përtej sesa SHQUP-i. Ka shkuar në segmente të caktuara të medias, madje dhe “burime të Prokurorisë” janë bërë si qytetari dixhital. Edhe sot mbase e gjejnë diçka për të synuar të bëjnë pis Policinë e Shtetit dhe punën tonë. Me siguri do dalë ndonjë portal, gazetë, ndonjë konferencë shtypi te SHQUP-i, që të hedhë një akuzë apo pak baltë tek puna jonë. Është shenja më e mirë e dëshpërimit e të gjithë atyre që deri dje nuk bënin dot këto që bëjmë ne dhe të gjithë atyre që nuk kanë sesi pajtohen dot me rezultatet tona”, tha ministri Tahiri.
Deklaratat e Tahirit vijnë në një kohë kur policia ka mohuar në mënyrë të vazhdueshme ekzistencën e raportit duke përgënjeshtruar publikisht disa media.
Top Channel
