Kapen 27 klandestinë. Ndalen në Pogradec, ikën nga Selaniku

28/09/2016 08:50

Qarku juglindor mbetet një prej pikave më të nxehta të kalimit klandestin nga shteti grek, ndërsa prezenca e refugjatëve sirianë në fqinjin tonë po u jep mundësi lulëzimi trafikantëve, të cilët përfitojnë nga situata. Tre persona janë arrestuar nga policia pasi po transportonin me mjetet e tyre 27 klandestinë me kombësi siriane, irakene dhe sudaneze, të cilët vinin nga një kamp i qytetit të Selanikut dhe kishin kaluar ilegalisht kufirin e gjelbër drejt tokës shqiptare.

Leonard Jaçellari, 28 vjeç, banues në fshatin Hudënisht (Pogradec), Vasil Kuburja, 47 vjeç, banues në Elbasan dhe
Arsen Çekiçi, 44 vjeç, banues në fshatin Buçimas (Pogradec) u kapën në afërsi të kryqëzimit të Vërdovës, teksa ishin duke transportuar 27 klandestinët, mes të cilëve edhe 12 fëmijë.

Burime policore bënë me dije se kanë qenë informacionet konfidenciale ato të cilat bënë të mundur organzimin e operacionit “Vërdova” dhe kapjen e rastit. Tre të arrestuarit u kishin premtuar shtetasve të huaj se do t’i ndihmonin për të shkuar drejt vendeve të BE-së, duke kaluar nëpërmjet territorit shqiptar, kundrejt shumës prej 1200 eurosh për personat e rritur dhe 600 euro për fëmijët. Pas përfundimit të veprimeve, 27 klandestinët janë transportuar drejt Qendrës Kombëtare Pritëse për Azilkërkuesit, në Babrru, ndërsa policia ka sekuestruar 3 automjete, dy prej të cilave tip “Ford” me targa AA 370 IR dhe  AA 622 MY, automjeti tip “Mercedes-Benz” me targa TR 3127 T si dhe 4 aparate celularë.

Top Channel