Botërori, sfidë jo e pamundur. Duka: Cana, i mirëpritur në pankinën e Kombëtares

Ai thotë se askush nuk duhet të marrë të mirëqenë kualifikimin në Botëror, por as eliminimin prej tij. Duka i hap derën Lorik Canës për në pankinën e kombëtares së futbollit shqiptar, por pa folur konkretisht nëse kjo prek postin e Gianni de Biasit.

Sa u përket kualifikueseve të Botërorit të 2018-s, presidenti i FSHF-së Armando Duka refuzon të bëjë parashikime, por është i bindur në diçka.

“Ne ndoshta mund të kemi pikë të sigurta, por asnjë tripikësh të sigurtë për ta fituar dhe asnjë tripikësh të sigurtë për ta humbur”, ka thënë kreu i futbollit shqiptar.

Presidenti i ri i UEFA-s, Alexander Ceferin ka qenë zgjedhja e dytë e Federatës Shqiptare të Futbollit, pas tërheqjes së kandidaturës spanjolle, megjithatë, ish-presidenti i Federatës Sllovene të Futbollit në postin e ri ka premtuar shumë për rajonin.

“Kanë qenë tri kandidatë nga fillimi. Një nga kandidatët ishte presidenti i Federatës Spanjolle, që u tërhoq, por nëse do të ishte ai në garë ne do të mendoheshim. Në kushtet kur mbetën dy kandidatë, ne mbështetëm presidentin që u zgjodh, edhe për një arsye rajonale për të mbështetur kandidatët apo vendet e rajonit”, tha Armand Duka, president i Federatës Shqiptare të Futbollit.

Në fund, presidenti Duka tregon sesi Cana dëshiron ende të luajë futboll. Por pavarësisht kësaj, me licencën e sapomarrë të trajnerit, FSHF-ja i ka dyert e hapura.

“Loriku i ndjek rregullisht kurset e UEFA-s për të qenë një person i certifikuar si trajner. Nuk jam i sigurtë nëse ka vendosur. Në fakt, me sa kam folur, ai nuk ka vendosur se çfarë do të bëjë. Ka dëshirë të vazhdojë të luajë ende futboll. Nuk e di nëse do të luajë apo jo, megjithatë, pasi ai të ketë vendosur, unë besoj se të gjithë ne duhet t’i japim një mundësi e ta mbështesim të realizojë ëndrrat e veta”, tha Armand Duka.

Presidenti i Federatës Shqiptare foli për herë të parë për Top Channel për çështjen e trukimeve, ku vulosi gjithçka duke u shprehur se Skënderbeu mbetet kampion i vendit. Në intervistën e transmetuar një ditë më parë në TCH, kreu i FSHF-së foli edhe për përfshirjen e politikës në futboll, duke goditur thuajse drejtpërdrejt tifozin më të zjarrtë nga radhët e politikës në stadiumet tona, deputetin Erion Braçe, nga i cili pati edhe një reagim.

Top Channel