I dyshuari për sulmet, Trump kundër mjekimit të tij

20/09/2016 00:00

Donald Trump është shprehur kundër mjekimit në spitalin e përfaqësimit ligjor të autorit të dyshuar të sulmit në Nju Jork, Ahmad Khan.

28-vjeçari i lindur në Afganistan u ngarkua me 5 akuza për tentativë vrasje pasi u arrestua nga policia të hënën. Për kandidatin republikan në zgjedhjet presidenciale kjo është një situatë e trishtë që nxjerr në pah sigurinë e dobët kombëtare.

“Gjëja më e keqe është se ne po i ofrojmë atij kujdes të madh shëndetësor. Ai do të kurohet nga disa prej mjekëve më të mirë në botë. Do të qëndrojë në një dhomë moderne spitali dhe me shumë gjasa do të ketë edhe shërbim dhome. Çfarë situatë e trishtë!”, u shpreh Trump.

Manjati i pasurive të paluajtshme sugjeroi se çdo ndëshkim do të ishte shumë i butë për Rahamin. Sipas rivales së tij demokrate, Hillary Clinton kjo lloj retorike vetëm sa i ndihmonte grupet terroriste.

“Kjo lloj retorike dhe gjuhe që Trump po përdor është në favor të kundërshtarëve tanë. Kjo është pikërisht ajo që duan terroristët, ta kthejnë këtë në një luftë kundër Islamit dhe jo xhihadistëve të dhunshëm”, tha Clinton.

Clinton shtoi se ishte e vetmja kandidate e pajisur me eksperiencën për të qenë pjesë e vendimeve të vështira për mundjen e terrorizmit. Dhe nuk ka vonuar reagimi Trump-it, i cili replikoi se presidenca e ish-sekretares së Shtetit do të kontribuonte në shtimin e sulmeve dhe vrasjen e më shumë amerikanëve të pafajshëm.

Trump përsëriti thirrjet për verifikime ekstreme tek të sapoardhurit, ku mund të përfshihen edhe vlerësimet nëse emigrantët e mundshëm ndajnë të njëjtat vlera amerikane. Cështja e sigurisë kombëtare u kthye në një çështje qendrore të zgjedhjeve pas një seri bombardimesh në fundjavë që kulmuan me arrestimin e të dyshuarit, Rahami të hënën.

Top Channel