Armëpushimi në Siri mban, por civilët janë ende në pritje të ndihmave
16/09/2016 00:00
Shkatërrimi i të korrave lë miliona njerëz përballë urisë në jug të Afrikës (fotot)
18/04 19:35
Sirianë që kanë mbetur pa ushqim në Lindje të Aleppos janë ende në pritje të ndihmave humanitare, edhe 3 ditë pas hyrjes në fuqi të armëpushimit të ndërmjetësuar nga SHBA-Rusi.
OKB-ja është e zemëruar për shkak se karvanët e saj janë ende në kufirin turk, pasi lejet e premtuara nga qeveria siriane nuk janë materializuar ende. Sipas Rusisë, një aleate e qeverisë siriane, forcat e kësaj të fundit po tërhiqen nga Aleppo.
Por Departamenti amerikan i Shtetit bëri me dije se nuk ka informacion që të tregojë tërheqjen e ushtrisë. Ndihmat humanitare për zonat e rrethuara ishin një nga pikat e marrëveshjes që u arrit në kuadër të armëpushimit të negociuar nga SHBA-të dhe Rusia.
Por më shumë se 20 kamionë, që kanë ushqim për rreth 250 mijë sirianë të rrethuar, janë ende në kufirin turk dhe nuk mund të nisen pa lejet e premtuara.
Staffan de Mistura, i dërguari special i OKB-së për Sirinë, tha se nuk ka marrë dokumentet që do të lejonin kalimin e karvanëve në postblloqet ushtarake. Si pjesë e armëpushimit, palët ndërluftuese duhet të tërhiqen për të krijuar hapësirën e nevojshme për kalimin e ndihmës, por rebelët pretendojnë se ushtria nuk ka lëvizur nga vendi.
Zemërimi për këtë është shprehur qartë edhe nga banorët e zonave lindore të Aleppos, që thonë se rrethimi i qeverisë vazhdon dhe se nuk ka asnjë mundësi që ndihmat të shkojnë tek ata.
Megjithëse janë raportuar shkelje sporadike nga të dyja palët, armëpushimi po mban. Por nëse ndihmat humanitare nuk lejohen të kalojnë, ai nuk ka asnjë vlerë, pasi pikërisht ndihmat për civilët e bllokuar ishin edhe qëllimi kryesor i tij.
Top Channel
