Rama: Më të mirët zgjedhin të parët! Procedurat janë transparente

“Një nga risitë e Reformës në Arsim është më të mirët zgjedhin të parët! Po sigurisht, një maturant i shkëlqyer nuk mund të shkojë në tetë, nëntë apo dhjetë degë, ku shpreh fillimisht preferencën dhe del fitues! Deri në 20 shtator, çdo fitues në më shumë se një degë, do të regjistrohet në degën e vetme që do ndjekë dhe, automatikisht, të gjitha vendet e tjera që ka zënë përkohësisht në listën fituese, do të lirohen për shpalljen e fituesve të tjerë”, shkruan Rama.

Kryeministri thekson se zgjedhjet përcaktohen sipas meritës dhe me një procedurë transparente.

“Pra, e drejta për të zgjedhur përcaktohet sipas meritës, me procedura transparente, jo më në errësirë sipas tarafit apo parasë… Rregullat janë të qarta dhe kush ndjek si duhet procedurat, padiskutim do të ushtrojë të drejtën e vet për shkollim të lartë, sipas meritës”.

Edi Rama, më tej, vë në dukje se vetëm një pjesë e vogël e studentëve do të mbesin jashtë procesit dhe ata do të jenë më të dobëtit në rezultate.

“Suksese dhe mos harroni: Janë 25 mijë kuota për 27 mijë e 600 aplikues, kështu që ata që do mbeten jashtë në fund të procesit, do të jenë një numër i kufizuar e me rezultatet më të dobëta ndër gjithë të tjerët. Prandaj respekt për meritën e secilit dhe durim deri në përfundimin e procesit!”, përfundon statusi i Kryeministrit.

Top Channel