Incidenti diplomatik i Trumpit, Clinton refuzon ftesën e presidentit meksikan

Në një ekstrakt të intervistës së dhënë për “ABC News”, Clinton është shprehur me një “Jo” të prerë, kur u pyet nëse do të udhëtonte drejt Meksikës përpara zgjedhjeve të 8 nëntorit, pa dhënë shpjegime të mëtejshme. Edhe drejtuesit e fushatës së saj konfirmuan më pas vendimin e saj.

“Ne e kuptojmë dhe e respektojmë vendimin e saj për të propozuar kohën e zhvillimit të takimit”, tha ministrja e Jashtme meksikane, Claudia Ruiz Massieu, në një status të sajin në “Twitter”, duke shtuar se kontaktet me drejtuesit e fushatës së Clintonit janë të vazhdueshme.

Pena Nieto u kishte bërë ftesa të dy kandidatëve presidencialë gjatë muajit të kaluar, ndërsa Trump iu përgjigj pozitivisht duke udhëtuar drejt Mexico Cityt të mërkurën e kaluar, në një takim që u duk se do të ishte miqësor, por më pas shpalosi sërish tensionet e thella mes dy vendeve.

Trump, kandidati zyrtar i republikanëve për Shtëpinë e Bardhë, është kritikuar ashpër në Meksikë, pasi ka thënë se prej këtij vendi kishin hyrë në SHBA shumë përdhunues dhe trafikantë droge. Ai bëri sërish thirrje për ndërtimin e një muri në kufi, për të cilin do të paguanin meksikanët.

Në konferencën e përbashkët për shtyp me Pena Nieton, Trump tha se ata nuk kishin diskutuar se cilët do të paguanin për murin. Pena Nieto mbeti sërish i heshtur pas kësaj çështjeje gjatë asaj konference, por më pas, përmes “Twitter”-it tha se ai e kishte bërë të qartë se Meksika nuk do të paguante asgjë për ndërtimin e atij muri.

“Ai erdhi të thoshte diçka, ndërsa presidenti meksikan e kundërshtoi atë thuajse menjëherë”, thotë Clinton, ish-Sekretare amerikane e Shtetit, në intervistën për amerikanen “ABC”. “Ai as nuk e ngriti atë çështje për diskutim, por thjesht bëri diçka asfiksuese. Ai nuk di madje as të komunikojë në mënyrë efektive me një kryetar shteti. Ndaj dhe besoj se është plotësisht i qartë rezultati i atij takimi”, shton ajo.

Top Channel