Ndjekje spektakolare në mes të detit, kapet korrieri shqiptar me drogë (video)

Fillimisht, dy motorët kanë shkelur “vijën” e satelitit mbikëqyrës dhe më pas në drejtim të tyre janë vënë motoskafët e marinës italiane, të cilët i kanë dhënë jetë një ndjekjeje spektakolare, të denjë për filmat aksion.

Dy mjetet motorike, të favorizuar nga errësira dhe kushtet e mira të detit, synonin të arrinin tokën për të dorëzuar ngarkesën.

Agjentët e Guardia di Finanza kanë ngritur dyshime kur kanë konstatuar praninë e tyre në orët e para të mëngjesit dhe menjëherë kanë lajmëruar kolegët e marinës së Barit.

Motovedetat kanë arritur të ndalojnë njërin prej trafikantëve, shtetas shqiptar, pas një ndjekjeje të gjatë; ndërsa tjetri, i ndodhur më pranë tokës ka arritur të zbarkojë dhe të zhduket në rrugët e lokalitetit të Frigoles.

Ushtarakët kanë arrtur të sekuestrojnë sasinë e marijuanës, 214 kg, e cila ishte e lidhur tek pjesët anësore të mjeteve motorike, e mbështjellë me qese plastike të zezë dhe e lidhur me letër ngjitëse.

Në treg ajo do t’i kishte sjellë organizatës kriminale përgjegjëse fitime mbi 2 milionë euro, kanë deklaruar agjentët e GDF-së.

Shtetasi shqiptar i arrestuar është identifikuar me inicialet T.L, 37 vjeç nga Vlora, me precedentë të shumtë në Itali për trafik narkotikësh. Ndaj tij rëndojnë akuzat për “mbajtje dhe trafik droge” si dhe për “shkelje të kodit të lundrimit dhe sigurisë në det”.

“Po zhvillohen hetime për identifikimin e porositësve të marijuanës në Itali dhe furnizuesit në Shqipëri dhe në këtë drejtim do të nevojitet bashkëpunimi i policisë shqiptare”, thuhet në një deklaratë online të GDF-së.

Top Channel