Meksikë, zhduket djali i “El Chapo”-s

17/08/2016 09:30

Arsyet e rrëmbimit të 16 njerëzve nga një resort turisik në Meksikë nuk janë më mister, pasi autoritetet bënë me dije se mes të rrëmbyerve ishte djali i super trafikantit të drogës, Joaquin “El Chapo” Guzman.

Policia meksikane tha se Jesus Alfredo Guzman, 29 vjeç, ishte një prej 6 anëtarëve të kartelit Sinaloa që u rrëmbyen nga banda rivale Brezi i Ri i Xhaliskos në resortin turistik të Puerto Vallartas. Babai i tij, tashmë në burg, udhëhoqi kartelin Sinaloa prej vitesh dhe besohet se Jesus Guzman është një prej anëtarëve kryesorë të tij.

Edhe ky i fundit kërkohet nga SHBA. 6 anëtarët e Sinaloas u rrëmbyen bashkë me njerëz të tjerë në një restorant në Puerto Vallarta dhe fillimisht autoritetet nuk dinin arsyet e këtij gjesti. Por, zbulimi se mes të rrëmbyerve ishte Jesus Guzman duket se nxorri në dritë arsyet. Nuk dihet me siguri, por mediat raportojnë se mes të rrëmbyerve mund të jetë edhe një djalë tjetër i Guzmanit, Ivan Guzman.

Sipas policisë, viktimat e rrëmbimit kishin mbërritur në Puerto Vallarta nga zona të ndryshme të Meksikës për të festuar. Ekspertët ndërkohë paralajmërojnë se ky rrëmbim mund të ashpërsojë luftën mes dy karteleve të drogës, që prej kohësh përballen për kontrollin e rrugëve të drogës në bregdetin e Paqësorit.

Top Channel