Përmbytjet në Maqedoni, Meta: Mbështes çdo iniciativë ndihme të qeverisë

07/08/2016 00:00

Kreu i Kuvendit,  Ilir Meta ka reaguar për situatën e rëndë të krijuar në Maqedoni pas reshjeve të dendura të shiut, ku deri tani raportohet për 20 persona të cilët kanë humbur jetën.

Duke folur në emër të institucionit që ai përfaqëson, Meta shprehet se ka ndjekur me shqetësim të thellë situatën e jashtëzakonshme të krijuar në Maqedoni duke shtuar se “Ne nxisim, mbështesim dhe përshëndesim çdo iniciativë të qeverisë shqiptare për t’ju gjendur pranë, sipas mundësive tona, qytetarëve të Maqedonisë dhe autoriteteve zyrtare të Shkupit dhe të Tetovës”.

Reagimi i plotë i Kreut të Kuvendit, Meta
Me shqetësim të madh, trishtim të thellë dhe solidaritet të plotë kam ndjekur situatën e pazakontë të krijuar nga reshjet e shiut në Maqedoni dhe veçanërisht në Shkup e Tetovë.

Në këto momente dramatike unë bashkoj dhembjen time me të gjithë familjarët e viktimave dhe lutjet e sinqerta për të ndalur me kaq ky bilanc tragjik humbjesh.

Ngushëllimet më të thella për ta dhe solidaritet me gjithë të prekurit nga kjo fatkeqësi e tmerrshme natyrore.

Në emër të Kuvendit të Shqipërisë ju përcjell banorëve të këtyre zonave dhe autoriteteve zyrtare të Maqedonisë, të Shkupit dhe të Tetovës, solidaritetin tonë më të thellë. Ne nxisim, mbështesim dhe përshëndesim çdo iniciativë të qeverisë shqiptare për t’ju gjendur pranë, sipas mundësive tona, qytetarëve të Maqedonisë dhe autoriteteve zyrtare të Shkupit dhe të Tetovës.

Kam besim të plotë se banorët e prekur nga kjo fatkeqësi natyre, autoritetet zyrtare të fqinjit tonë, por dhe partnerët evropianë të Maqedonisë dhe sidomos fqinjët e tij, do të jenë në një front e në një aksion të përbashkët për të përballuar tërbimin e natyrës dhe për të minimizuar në maksimum, dëmet e shkaktuara.

Top Channel