Mbollën 685 rrënjë kanabis në territorin grek, arrestohen dy shqiptarë
20/07/2016 00:00
Artizanët në Elbasan/ Tradita që trashëgohet ndër breza, nismë për të promovuar të rinjtë
13/04 20:27
Dy shtetas shqiptarë, 31 dhe 37 vjeç, janë arrestuar në vendin e quajtur Delvinaki, pak kilometra larg kufirit shqiptar, nën akuzën e kultivimit të lëndëve narkotike.
Sipas policisë greke, dy shtetasit shqiptarë u kapën në flagrancë duke ruajtur një plantacion me 685 rrënjë kanabis sativa.
Autoritetet greke thonë se lënda narkotike ishte mbjellë në një përrua dhe zbulimi i saj ishte tepër i vështirë. Dy shtetasit shqiptarë deklaruan se e kishin mbjellë dhe kujdeseshin për bimët narkotike, lartësia e të cilave i kalonte 1.5 metrat.
Policia greke thotë se në zonën kufitare midis dy vendeve dhe në pyjet e dendura të kufirit dyshohet se janë mbjellë sasi të mëdha bimësh narkotike.
Në zonë u gjetën edhe mjetet që ata përdornin për punimin e tokës dhe vaditjen e saj. Gjithashtu, polica greke gjeti edhe një sasi plehu kimik, si dhe fishekë çifteje e armë të ftohta.
Trafikantët shfrytëzojnë mungesën e forcave policore në zonë, por edhe terrenin e thyer të kufirit, për kultivimin e lëndëve narkotike. Vetëm gjatë muajit korrik, në zonën e Epirit janë zbuluar dhe asgjësuar disa plantacione, në të cilat janë gjetur mijëra rrënjë kanabis.
Dy të arrestuarit do të dërgohen në Gjykatën e Janinës për masë sigurie.
Top Channel
