Dislokimi i mbrojtjes raketore, Koreja e Veriut kërcënon me “sulm fizik”

Një deklaratë e publikuar nga ushtria, përmes medias shtetërore të vendit komunist, ekspozonte “vullnetin e palëkundur të ushtrisë sonë për t’u kryer një sulm të pamëshirshëm hakmarrës”.

Veriu komunist bën shpesh të tilla kërcënime kundër Jugut fqinj dhe SHBA-ve. Retorika është diçka normale, e madje përshkallëzohet në kohërat kur tensionet rriten mes tyre. Kur Shtetet e Bashkuara vendosën sanksione gjatë javës së kaluar ndaj kreut të Koresë së Veriut, Kim Jong-un, Peniani e përshkroi këtë lëvizje si një “deklaratë të hapur lufte”.

Vetëm një ditë pasi u njoftua dislokimi i sistemit mbrojtës “THAAD”, Veriu komunist lëshoi për testim një raketë balistike nga një nëndetëse në brigjet e saj lindorë, por ushtria e Koresë së Jugut tha se edhe ky lëshim dështoi.

Ende nuk është saktësuar se kur do të dislokohet sistemi mbrojtës raketor, ku do të vendoset dhe kush do të ketë kontrollin përfundimtar të tij.

Deklarata e byrosë së artilerisë të ushtrisë koreanoveriore bënte të ditur se do të ndërmerrej “një kundërveprim fizik për të kontrolluar tërësisht THAAD-in, që nga momenti kur të konfirmohen vendi dhe koha e dislokimit të tij nga Koreja e Jugut”.

Sistemi “THAAD” kundërshtohet gjithashtu nga Pekini dhe Moska, të cilat e konsiderojnë këtë lëvizje si një përforcim të pranisë ushtarake amerikane në rajon. Të premten, Kina tha se sistemi do të dëmtojë paqen dhe qëndrueshmërinë, si dhe dorëzoi një notë proteste ndaj të dërguarve të Amerikës dhe Koresë së Jugut.

Por SHBA-të dhe Jugu argumentuan se ky hap është i rëndësishëm për shkak të intensifikimit të kërcënimeve nga Veriu, që megjithëse i janë ndaluar aktivitete të tilla nga Kombet e Bashkuara, ka zhvilluar sërish një seri testimesh raketore, ndërsa në janar zhvilloi edhe testin e katërt bërthamor.

Top Channel