Si përgjohej grupi i drogës, dërgesat e heroinës identifikoheshin si “beton”

09/07/2016 00:00

Në qershor 2015 krerët shqiptarë të grupit të trafikut të drogës, Jurgen Molla dhe Arif Çiço, janë takuar në Kosovë me turkun Abubekir Tuncedemir, i cili sipas marrëveshjes, duhet t’u shiste atyre një sasi heroinë.

Molla ia thotë në telefon bashkëpunëtorit të tij Arif Cico dhe pas marrëveshjes në formën e garancisë dërgon në Prizren në fund të qershorit, përmes njeriut të besuar të tij Orges Myftaraj, shumën prej 230 mijë euro.

Brenda të njëjtës datë, Molla takon Arben Prendin, e sipas dyshimeve, i jep 8 mijë euro për të transportuar heroinën. Nga përgjimet dyditore grupi i hetimit zbulon se droga mbahej e magazinuar në afërsi të Prishtinës.

Më pas, sipas raporteve të vëzhgimit, dy turq shfaqen teksa dorëzojnë me një valixhe drogën tek transportuesi Arben Prendi.

Pak ore pas këtij operacioni të trafikantëve, policia arreston në flagrancë Prendin teksa kalon pikën e Morinës. Në kamion i gjenden 15 kilogramë heroinë. Pas këtij aksioni, Jurgen Molla komunikon me bashkëpunëtorin e tij duke i thënë: “Vëlla, lëviz se i kanë kap. Preja telefonat”.

Gjashtë muaj pas kësaj goditjeje, grupi aktivizohet sërish. Turku Abubekir Tuncedemir dyshohet se kishte trafikuar 15 kg heroinë nga Turqia në Selanik dhe ndërmjetëson me Jurgen Mollën për të transportuar më tej drogën.

Përmes telefonit, Jurgen Molla bie dakord të blejë 5 kg heroinë. Transkriptet tregojnë bisedën mes Mollës dhe Shyqyri Kotorrit, i cili dyshohet se përfaqëson grupin në Greqi.

Kur flasin në telefon, droga identifikohet si beton. Por, sërish DEA dhe Policia greke ndërhyn dhe godasin dy korrierët turq, Erol Beril dhe Songul Erek. Ndërsa 10 muaj më pas arrestohen edhe 10 pjesëtarë të tjerë të grupit në Greqi.

Top Channel