L’Equipe: Finalja e Euro 2016 vendos dhe fituesin e “Topit të Artë”

Ky është hamendësimi i prestigjiozes franceze L’Equipe, e cila në faqen e saj të parë ka vendosur Ronaldon përballë Griezmann-it, duke shtruar pyetjen se cili mes tyre meriton të shpallet dhe futbollisti më i mirë i vitit në botë.

Gazetarët francezë kanë nënvizuar dhe atë se çfarë kanë bërë dhe arritur këta lojtarë gjatë këtij sezoni, por sërish në fund do të jetë finalja e të dielës ajo që do të thotë fjalë e fundit për “Topin e Artë”.

L’Equipe mendon se 25-vjeçari francez ka qenë vendimtar për suksesin e Atletikos sezonin e fundit.

I transformuar si futbollist nga trajneri Simeone, ai shënoi 22 gola, duke mos harruar këtu dhe super paraqitjet e tij në Champions ndaj Barcelonës dhe Bayern Munchen.

Përsa i përket kombëtares, ai u zgjua në momentin e duhur dhe ka shënuar 6 gola, duke iu afruar rekordit të Platinisë me 9 të tilla në një europian.

Gazetarët francezë shkruajnë se situata është ndryshe për Ronaldon, i cili është një lojtar tashmë i abonuar në ceremoninë e Topit të Artë, pasi ka qenë në podium tetë herë në 9 vitet e fundit.

Tani portugezi, i cili këtë viti me siguri nuk do ta ketë konkurrencën e Messit është pretendenti kryesor pas fitimit të Champions-it. Por për ta vulosur përfundimisht këtë, ai duhet të fitojë për herë parë dhe një titull të madh për kombin e tij.

Top Channel