Urimet e politikanëve për Bajram, Rama e Basha citojnë Kur’anin

Kreu i shtetit u shpreh se, “kjo festë e madhe na mbush të gjithëve me pak më shumë shpresë e vullnet”. “Në këtë ditë madhështore ju dëshiroj shëndet, begati, ndriçim të shpirtit”, shtoi Nishani.

Ndërsa deputeti i Partisë Socialiste, Pandeli Majko bëri një vizitë në selinë e Komunitetit Mysliman Shqiptar, me rastin e Fiter Bajramit. Në mesazhin e tij, përveç se uroi besimtarët, zoti Majko dha edhe një porosi për politikanët.

“Të gjithë besimtarëve gëzuar! Ju sjelltë Bajrami shëndet e të mira, ndërsa ne politikanëve pak më shumë mend në kokë”, tha Majko.

Edhe kryetari i Bashkisë së Tiranës, Erion Veliaj uroi të gjithë besimtarët myslimanë shqiptarë për ditën e Bajramit të Madh.

I shoqëruar nga kryetari i Këshillit të Qarkut të Tiranës, Aldrin Dalipi dhe anëtarë të Këshillit Bashkiak, Veliaj zhvilloi një vizitë në selinë e Komunitetit Mysliman Shqiptar, nga ku edhe i përcolli urimet e tij kreut të këtij komuniteti, Skënder Bruçaj.

Veliaj theksoi se në të përditshmen tonë, ditë të tilla na shërbejnë për të kuptuar se ka më shumë gjëra që na bashkojnë sesa që na ndajnë.

“Dua të falenderoj të gjithë ata që në muajin e Ramazanit sakrifikuan jo vetëm prej vetes së tyre, por sakrifikuan edhe të ardhurat e tyre për të qenë më solidarë. I falenderoj me gjithë zemër sepse e kanë bërë Tiranën më bujare dhe shumë më bashkëpunuese”, tha kryebashkiaku Veliaj.

Edhe kryetari i Partisë Demokratike, Lulzim Basha iu bashkua urimeve drejtuar besimtarëve me rastin e Fiter Bajramit.

“Gëzuar Fitër Bajramin çdo shqiptari. E di se Muaji i Ramazanit ka qënë një sakrificë e madhe për të gjithë agjeruesit, me ditë të gjata e të nxehta. Uroj që Zoti t’ua pranojë sakrificën dhe agjerimin si një ndjesë dhe si një bekim për të gjithë shqiptarët dhe kombin shqiptar. Këto janë ditë të vështira për mijëra familje. Janë ditë të pasigurisë, të varfërisë. Por festa e sotme është edhe një simbol shpresë dhe besimi”, tha Basha.

Në fund të vizitës në selinë e Komunitetit Mysliman, Basha gjatë mesazhit të tij citoi edhe vargjet e Kur’anit.

“Prej ditës së parë të Ramazanit më kanë mbetur në mend katër vargje të Kuranit të cilat me lejen tuaj do desha t’i kujtoj sot publikisht. Një sure e Kuranit që quhet Ndiçimi. Në mesditë kur shndrit dielli e natën kur erresia bie, Zoti yt nuk të ka braktisur, as zemëruar me ty nuk është. E patjetër çfarë po vjen më e mirë është se çfarë po shkon e Zoti bujar do të jetë me ty e ti i kënaqur. Zoti e bekoftë Shqipërinë dhe shqiptarët! Gëzuar Bajramin!”, tha Basha.

Kryeministri Edi Rama ka zgjedhur të urojë përmes rrjeteve sociale, edhe ai duke cituar librin e shenjtë të Islamit, konkretisht në kapitullin e pestë, paragrafi 8.

“Besimtarë, qofshi ju dëshmitarë të drejtë. Që asnjë urrejtja mos t’ju shtyjë në krahët e padrejtësisë. Praktikoni drejtësinë, kjo është përshpirtshmëri e vertëtë”, ka shkruar Rama në profilin e tij në Facebook.

Në mesazhin e radhës, kryetari i Kuvendit, Ilir Meta theksoi se vlerat e kësaj dite na nxisin për më shumë falje, tolerancë dhe mirëkuptim, si dhe për të bërë mirësi dhe për të zhvilluar një solidaritet më të madh me njëri-tjetrin.

Kryetari i Kuvendit shprehu edhe një herë krenarinë për bashkjetesën dhe harmoninë e shkëlqyer fetare që ekziston në vendin tonë. “Kjo harmoni është një meritë e veçantë e komuniteteve dhe e frymës së tolerancës që ato përçojnë”, tha ai.

Duke iu drejtuar besimtarëve myslimanë në këtë ditë feste, Meta uroi që Zoti t’ia shpërblejë të gjitha sakrificat e tyre shpirtërore e fizike dhe njëkohësisht që të gjithë shqiptarët të gjejnë sa më shumë paqe, lumturi dhe begati në familjet e tyre.

Top Channel