Çikalleshi: Asnjë nuk e ka të sigurt vendin në formacion

“Të jesh sulmues i Kombëtares është nder dhe privilegj. Ai vend nuk ishte pronë e imja. Me paraqitjet në çdo ndeshje, çdo lojtarë mund të luajë. Paraqitjet e Sadikut kanë qenë të mira dhe trajneri e ka menduar se ai ishte zgjedhja më e mirë për ekipin dhe unë e pranoj. Ajo që është më e rëndësishme është se po presim një arritje madhore”, tha Çikalleshi në konferencën për shtyp të së martës.

Kalimi i grupit është dëshira e të gjithëve dhe kjo i zbeh të gjitha diskutimet rreth faktit se cilët lojtarë luajnë në formacion.
 
“Personalisht jam gati, por në fund është trajneri ai që vendos cili do të luante. Fillimisht do të isha i lumtur të kalonim grupin dhe të kishim një ndeshje tjetër, më pas zgjedhjet i bën trajneri”, tha sulmuesi.

Festa për fitoren me Rumaninë, ia ka lënë vendin ankthit dhe tensionit të pritjes. Kombinimet e mundshme për kualifikimin e Shqipërisë në 1/8-at janë tema e përditshme e diskutimeve në radhët e kuqezinjve. Kjo pranohet edhe nga vetë sulmuesi.

“Pritja duhet parë në dy këndvështrime. Në anën pozitive, sepse po presim diçka madhore si kalimi i grupit. Është një arritje e madhe dhe shpresojmë të kemi një fund të lumtur. Por, kjo ka edhe anën negative, pasi jemi në tension, çdo natë flasim me lojtarët e tjerë si mund të kualifikoheshim”, tregon ai.

Jo rastësisht, nga grumbullimi në Perros Guirrc, stafi dhe lojtarët e Kombëtares grumbullohen në hollin e hotelit, për të ndjekur të gjitha ndeshjet e grupeve, me shpresën se do të vijnë rezultatet që do të kualifikonin Shqipërinë.
 
“Në çdo moment kur ulemi. Edhe dje po ndiqnim ndeshjen e Anglisë, kur Vardi me shokë shpërdoronin rastet. Një shans e humbëm, por ka ndeshje të tjera. Është situatë e sikletshme, por po e presim me kënaqësi”, u shpreh Çikalleshi.

Top Channel