Erjon Veliaj zgjodhi në mënyrë simbolike ditën kur qytetarët i besuan drejtimin e Tiranës për të prezantuar projektin më të rëndësishëm të zhvillimit social dhe mjedisor të kryeqytetit.
Plani Urbanistik i realizuar në bashkëpunim me arkitektin italian Stefano Boeri propozon Tiranën me 7 qendra kryesore.
“7 qendrat janë: qendra kryesore(qendra klasike e Tiranës), qendra e Kombinatit, zona e Kinostudios, zona e Laprakës, pjesa e bulevardit të ri, e cila do të zhvillohet si një lagje e re, trekëndëshi i zonës industriale të Shkozës me Farkën, zona e Qytetit Studenti, Sauk Lundër”, shpjegoi Veliaj.
Por, për kreun e bashkisë, që këto qendra të funksionojnë realisht si të tilla, nevojitet mobilimi i tyre me infrastrukturën e nevojshme.
“Kjo do të thotë që shumë prej institucioneve arsimore, financiare, administrative, shërbime të tjera publike duhet të grupohen sipas propozimit tonë në këto 7 qendra”, tha Veliaj.
Projekti më sfidues është ai i krijimit të pyllit më të madh metropolitan në Ballkan të krijuar nga dora e njeriut.
“Nuk e di nëse mund ta imagjinoni këtu prezencën e pyllit orbital që përshkon të gjithë qytetin e Tiranës dhe ky pyll mund të kontribuojë me 2 mln pemë. Ka shumë rëndësi të kemi një oazë natyral”, tha arkitekti Boeri.
Konturi përshkon parkun e Dajtit, liqenin e Farkës, atë Artificial dhe lumin e Tiranës. Qytetarët do të kenë edhe dy unaza të gjelbra dedikuar përdoruesve të transportit publik, këmbësorëve dhe biçikletave.
Top Channel