Orlando, Obama ngushëllon familjet e viktimave të masakrës

E ndërsa Orlando përgatitet të varrosë viktimat e parë të asaj masakre, Obama dhe zëvendësi i tij, Joe Biden, kaluan orë të tëra në takime private me të mbijetuarit e sulmit, të afërmit e viktimave, por edhe oficerët e policisë që iu përgjigjën në vendngjarje agresorit ditën e dielë, kur 49 persona mbetën të vdekur.

Vizita pa shumë bujë reflekton edhe njëherë sfidën që ka presidenti amerikan për të gjetur diçka domethënëse mbi sulmin e fundjavës së kaluar, që përhapi një sërë ndjenjash frike dhe terrorizmi, por edhe armësh e dhune ndaj homoseksualëve.

Thirrja e Obamës për solidaritet dhe ndjeshmëri është në kontrast me debatin e turbullt politik në Uashington, si dhe ethet e fushatës që ka sjellë përçarje që prej sulmit të Floridës. Senatori i Arizonës, John McCain, një republikan dhe kritik i përhershëm i Obamës, akuzoi presidentin se ishte “drejtpërdrejt përgjegjës” për masakrën, sepse – siç tha ai, – Obama ka lejuar rritjen e grupit të Shtetit Islamik nën qeverisjen e tij.

Agresori, Omar Mateen kishte lëshuar disa thirrje gjatë sulmit, duke bërë të ditur se ishte mbështetës i Shtetit Islamik. Por drejtori i CIA-s, John Brennan bëri të ditur këtë të enjte se, agjencia e drejtuar prej tij nuk kishte gjetur ende asnjë lidhje mes agresorit dhe organizatës së huaj terroriste.

Shtëpia e Bardhë, gjithsesi nuk i është përgjigjur komenteve të McCainit, të paktën deri më tani.

Hetuesit janë përpjekur të rindërtojnë lëvizjet e terroristit 20-vjeçar, përpara se të hapte zjarr në klubin e natës “Pulse”, përfshi edhe atë se çfarë mund të ketë ditur bashkëshortja e tij mbi këtë sulm. Zbulueshmëria e këtij krimi ka shkuar deri atje sa, Komiteti për Sigurinë Kombëtare në Senatin amerikan i ka dërguar një letër rrjetit social “Facebook”, përmes së cilës i kërkon ndihmë në rishikimin e mesazheve të lëna apo të dërguara nga llogaria e lidhur me Mateen, përpara dhe gjatë sulmit.

Top Channel