Jordani, sulm terrorist ndaj selisë së Shërbimeve Sekrete; 5 të vrarë

Sipas raportimeve të para, bëhet fjalë për një sulm të armatosur ndaj zyrave të Shërbimeve të Përgjithshme të Inteligjencës (GIS) në Veri të Ammanit, sipas ministrit për Çështjet e Medias, Mohammed al-Momani, i cili ka folur për gazetën jordaneze “Al-Ghad”.

Një roje jashtë ndërtesës, një punonjës zyre dhe 3 oficerë jordanezë kanë mbetur të vdekur nga ky sulm. El-Momani tha se zyrat e “GIS” pranë kampit të refugjatëve të “Baqaa”-së u shënjestruan nga një sulm terrorist vetëm pak përpara orës 7 të mëngjesit.

Al-Momani tha gjithashtu se sulmi vjen në ditën e parë të Ramazanit, ndaj dhe përfaqëson një devijim të qartë nga besimi Islam, ndërsa gjaku i qytetarëve të rënë sot është derdhur për të mbrojtur Jordaninë dhe shtetasit e saj.

Ministri Al-Momani theksoi më tej se shërbimet e sigurisë janë vënë në ndjekje të agresorëve, ndërsa po hetojnë edhe rrethanat e sulmit. Sipas tij, jordanezët qëndrojnë të bashkuar në përballimin e përpjekjeve për të dëmtuar forcat e tyre të sigurisë, dhe se sulme të tilla vetëm sa do të rrisin kohezionin e jordanezëve në luftimin e “forcave djallëzore”.

Top Channel